Милиция кызматкери аялына зомбулук көрсөттү деген маалымат боюнча Ош ШИИБи комментарий берди

16-декабрда интернет булактарында милиция кызматкери аялына зомбулук көрсөткөнү жана аялынын арызын Ош ШИИБнин Ак-Буура милиция бөлүмү ишти кыскартып койгондугу тууралуу маалымат тараган. Буга байланыштуу Ош шаардык милициясы маалымат таратты.

Алардын айтымында, арыздануучунун күйөөсү Ош шаардык ички иштер башкармалыгында иштебейт.

3-декабрда Ош шаарынын 45 жаштагы Ө.Д. аттуу тургуну үйүндө күйөөсү ургандыгын билдирген. Бул факты Ош ШИИБнин Ак-Буура милиция бөлүмүнө катталып, текшерүү иштери башталган. Анда келиндин күйөөсү аялы менен сөз талашып, айтыша кеткендиктен түртүп диванга отургузуп койгонун, бирок кол көтөрбөгөнүн айткан.

Аялынын денесинен алган жаракатын аныктоо максатында соттук-медициналык экспертиза дайындалган. Ага ылайык, аялы денесинен жеңил жараат алгандыгы аныкталган.

Бул учурда жабырлануучунун күйөөсүнүн аракетинде Укук бузуулар кодексинин 70-беренеси (үй-бүлөдөгү зомбулук) укук бузуучулук толугу менен жасалган. Ошол эле учурда кылмыштын курамы аныкталбагандыктан, 10-декабрь күнү кылмыш иш козгоодон баш тартылган. Ал эми токтомдун бир нускасы Укук бузуулар жөнүндө кодексинин 70-беренесинин негизинде чара көрүү үчүн Ош ШИИБнин Ак-Буура милиция бөлүмүнүн коомдук коопсуздук кызматына жиберилген.