Нурланбек Шакиев "Бийлигиңе түкүрдүм" деген Адахан Мадумаров жообун аларын айтты

Бүгүн, 22-декабрда Жогорку Кеңештин жыйынында Кундузбек Сулайманов депутат Адахан Мадумаровдун айткан сөзүн сынга алды.

"Урматтуу коллегалар, эртең менен бир коллегабыз чыгып "Мен бул бийликке түкүрдүм" деди. Бул бийликте биз дагы барбыз, демек, бизге дагы түкүрдү болуп калдыбы? Төрага, сиз жетекчи катары тартипке чакырып койсоңуз, сүйлөгөндө дагы абайлап сүйлөш керек. Бизди эл карап турат", - деди Сулайманов.

Өз кезегинде төрага Нурланбек Шакиев Адахан Мадумаров өзүнүн жообун ала тургандыгын белгиледи.

"Тилекке каршы, ал сөз болгондо мен бул жерде жок элем. Болгонумда сөзсүз өзүмдүн жообумду бермекмин. Азыр ал киши жыйында жок. Буюрса, татыктуу жообун беребиз", - деди Шакиев.

Бүгүн, 22-декабрда Жогорку Кеңештин жыйынында депутат Адахан Мадумаров "Бийлик камактагы 5 аялдан коркуп жаткан болсо, бул бийлигиңе түкүрдүм" деп айткан.