Акылбек Жапаров: "Кийинки жылы бюджеттин көлөмү 503 миллиард сомго жетет"

Кыргызстандын бюджети 2022-жылдын аягына 434,8 миллиард сомду түзөт. Бул көрсөткүч кийинки жылы 503 миллиард сомго жетет. Бул тууралуу министрлер кабинетинин төрагасы Акылбек Жапаров өкмөттүн бүгүнкү, 28-декабрда өтүп жаткан жыйынтыктоочу жыйыны учурунда билдирди.

Анын айтымында эки жылда өлкөнүн бюжети эки эсеге өскөн.

“Садыр Жапаров бийликке келгенде консолидацияланган бюджеттин көлөмү 247 миллиард сом болсо, 2023-жылы 503 миллиард сомго жетебиз деп жатабыз. Ал эми акыркы 10 жылда салыктык түшүүлөрдүн эң көбү 70 миллиард сом болсо, 2022-жылдын аягына чейин 155 миллиард сом чогултулду”, - деди төрага.

Белгилей кетсек, иш-чарада министрлер кабинетинин 2022-жылы аткарылган иштери боюнча отчёту угулуп, 2023-жылга карата иш план каралууда.

Жыйынга өлкө башчы Садыр Жапаровдун төрагалысы астында өтүп жатат.

Ага борбордук мамлекеттик органдардын жетекчилери, министрлер кабинетинин мүчөлөрү, президенттик администрациянын түзүмдүк бөлүмдөрүнүн жетекчилери, Бишкек жана Ош шаарларынын мэрлери, президенттин облустардагы ыйгарым укуктуу өкүлдөрү катышууда.