Жогорку Кеңеш Орусия менен "Газпром Кыргызстан" мектеби боюнча келишимди ратификациялады

Жогорку Кеңештин 28-декабрдагы жыйынында Кыргызстан менен Орусиянын ортосундагы жалпы билим берүү уюмунун ишинин шарттары жөнүндөгү макулдашуу ратификацияланды.

Жыйында баяндама жасаган билим берүү жана илим министринин орун басары Надира Жусупбекова белгилегендей, макулдашуунун алкагында “Мектеп Газпром Кыргызстан” эки өлкөнүн мыйзамдарына ылайык билим берүү ишин жүргүзөт, окууну аяктагандан кийин бүтүрүүчүлөргө эки үлгүдөгү күбөлүктөр берилет.

"Майыптыгы бар балдарды, социалдык жактан аярлуу үй-бүлөлөрдүн балдарын, ошондой эле окууда мыкты жетишкендиктери бар балдарды - окуучулардын жалпы санынын 20 пайызынан ашпаган квота боюнча акысыз окууга кабыл алуу укугу каралган. Алсак, 2022-2023-окуу жылында бул квота боюнча мектепте 125 бала билим алып жатат. Бул окуучулардын тамак-ашына жана окуусуна кеткен чыгым жыл аягында 26 080 521 сомду түзгөн. Бул чыгымдарды “Мектеп Газпром Кыргызстан” коомдук фонду көтөрөт", - деди Жусупбекова.

Ошондой эле ал окуу жайды куруу жана ишмердүүлүгүн камсыздоо үчүн чыгымдарды "Газпром" ачык акционердик коому каржылаганын жана мектеп "Газпром Кыргызстанга" 20 жылга акысыз пайдаланууга берилгенин кошумчалады.