Бакыт Төрөбаев Мамлекеттик материалдык резервдер фондунун кампаларын текшерди

Министрлер кабинетинин төрагасынын орун басары Бакыт Төрөбаев Өзгөчө кырдаалдар министрлигине караштуу Мамлекеттик материалдык резервдер фондунун кампаларында сакталып турган азык-түлүктөрдүн жетиштүүлүгүн жана сактоо шарттары менен жеринде таанышып чыкты. Бул тууралуу бүгүн, 29-декабрда өкмөттүн маалымат кызматынан кабарлады.

Маалыматка ылайык, Төрөбаев эң көп пайдаланылган тамак-аш азыктарына кирген буудайдын, ундун, өсүмдүк майынын жана кумшекердин корун мамлекеттик кампаларда ашыгы менен сактап туруу азык-түлүк коопсуздугунун алдын аларын белгилеген.

Ошондой эле ал Чүй облусунун Кант шаарында жайгашкан өсүмдүк майын өндүрүү боюнча иш алып барган “Ли Бин” жоопкерчилиги чектелген коомунун ишмердүүлүгү менен таанышты.

"Ишкананын өндүрүштүк ишмердүүлүгү менен таанышып чыккан Бакыт Төрөбаев, мамлекеттик “РСК Банк” жана “Айыл Банк” банктарынын жетекчилерине азык-түлүк коопсуздугун камсыздоого катышкан ишканалардын арыздарын биринчи кезекте кароону тапшырды", - деп айтылат маалыматта.