Министрлик дарыгерлердин кармалышы боюнча үн катты

Саламаттыкты сактоо министрлиги Бишкекте баланын өлүмүнөн улам дарыгерлердин кармалышы боюнча үн катты. Министрлик билдирүүсүн социалдык тармактагы баракчасына чыгарды.

"Саламаттык сактоо министрлиги балдар дарыгерлерине байланыштуу болуп жаткан окуяны өкүнүч менен белгилейт. Тергөө иш-чаралары жүрүп жаткандыктан, бүгүнкү күндө биз аларга таасир эте албагандыктан, кырдаалга байкоо салып гана тура алабыз. Буйурса жакынкы күндөрү алардын чыгышына ишенебиз жана үмүт артабыз", - деп айтылат маалыматта.

Министрлик чарчап калган наристенин жакындарына көңүл айткан.

"Ооба, дарыгерлер айрым учурда медициналык жардам көрсөтө албай калышат, бирок бейтаптын өмүрүн сактап калуу үчүн акырына чейин зарыл болгон нерселердин баарын жасайт. Бул окуяга байланыштуу медицина чөйрөсүндөгүлөр жумушун таштап же иштен кеткиси келип жатканы тууралуу кептер айтыла баштады. Бардык медиктерди дүрбөлөңгө түшпөөгө жана мыйзамсыз аракеттерге барбоого чакырабыз", — деп айтылат маалыматта.

Мекеме дарыгерлердин туугандары жана жакындары менен байланышта болуп, колдон келген жардамды берип жатканын белгиледи.

"Ошондой эле, мындан ары ушул сыяктуу жагдайларды болтурбоо үчүн медициналык кызмат көрсөтүүнүн сапатына көзөмөлдү күчөтүү боюнча тапшырмалар берилди", - деп жазылат билдирүүдө.

Буга чейин Улуттук эне жана баланы коргоо борборунун жана шаардык балдар ооруканасынын дарыгерлери кармалган. Белгилүү болгондой, беш дарыгерге №1 тергөө абагында калтыруу боюнча баш коргоо чарасы тандалган, дагы бир дарыгер үй камагына чыгарылган.