Дубайдын полициясы ырчы Анжеликанын бир жыл мурун жоготкон 30 миң долларлык саатын таап берди

Дубай шаарынын полициясы эстрада ырчысы Анжеликанын мындан бир жыл мурун жоготкон баасы 110 миң дирхам болгон (30 миң доллар) саатын таап берди. Бул тууралуу маалымат каражаттары жазып чыгышты.

Кылмыш иликтөө башкы башкармалыгынын маалыматы боюнча, Анжелика Кайратова аэропортко барар алдында мейманкананын бөлмөсүндө саатын жоготуп алган. Ал Кыргызстанга келгенден кийин гана сааты жоголуп кеткенин билген. Бул тууралуу ырчы арыз менен кайрылган эмес.

Кылмыш иликтөө башкы башкармалыгынын директору, генерал-майор Жамал Салем Аль Жаллаф билдиргендей, департаментке мейманканадан кыргызстандык турист кымбат баалуу саатын унутуп калгандыгы тууралуу билдирүү түшкөн.

"Каттоодо калган номер туристтик агенттиктин номери болгондуктан сааттын ээси менен дароо байланыша алган жокпуз. Кошумча иликтөөлөрдөн кийин биз анын байланыш маалыматын алдык жана дароо телефон номери жана социалдык тармактагы аккаунту аркылуу байланышууга аракет кылдык, бирок майнап чыккан жок", - деген ал.

Ырчы Анжелика Дубайга барып, полиция жоготуп койгон саатын кайтарып бергенине таң калган.