Бишкекте митингге чыккандардын айрымдарын милиция кармап кетти (фото)

Бүгүн, 10-январда Бишкекте тынчтык митингине чыккан жарандардын айрымдарын милиция кызматкерлери кармап кетти.

Митингге чыккандар Кемпир-Абад иши боюнча камалгандарды бошотуу керектигин айтышкан. Жыйынтыгында милиция кызматкерлери алардын айрымдарын автобуска салып, алып кетти.

Белгилей кетсек, 23-октябрда милиция 20дан ашуун саясатчы, жарандык активисттерди кармап кеткен. Ички иштер министрлиги билдиргендей, аларга Кылмыш-жаза кодексиндеги “Массалык башаламандыктарды уюштурууга даярдануу” беренеси (36, 278) менен козголгон кылмыш иштин алкагында тергөө жүргүзүлүүдө.

Милиция кылмыш ишин козгоого алардын 22-октябрда борбор калаадагы кафелердин биринде өткөн жыйыны негиз болгонун билдирип, аларга карата коюлган айыптар боюнча далилдер жетиштүү экенин белгилеген. Ал эми кармалгандар муну саясий куугунтук катары баалап, күнөөсү жок экендигин айтып келишет.