Министрлер кабинетинде туризмди өнүктүрүү долбоорлору сунушталды

Министрлер кабинетинин төрагасы Акылбек Жапаров туризмди өнүктүрүүгө багытталган долбоорлор боюнча кеңешме өткөрдү. Бул тууралуу бүгүн, 13-январда өкмөттүн маалымат кызматынан кабарлады.

Маалыматка ылайык, жыйындын жүрүшүндө "Кыргызстанда туризмди өнүктүрүүнү колдоо фонду" ачык акционердик коому тарабынан иштелип жаткан долбоорлор сунушталды.

Атап айтканда, Раззаков шаарындагы 4 жылдыздуу мейманкана комплексинин, Баткен облусундагы санаториялык-курорттук комплекстин жана балдардын ден соолугун чыңдоочу лагердин долбоорлору көрсөтүлдү.

"Кыргыз Республикасында туризмди өнүктүрүүнү колдоо фонду" ачык акционердик коомунун өкүлдөрү 960 миллион доллар суммасындагы 32 бирдиктен турган санаториялык-курорттук объектилер тармагын өнүктүрүү долбоорун сунуштады. Ошондой эле "Ак-Кеме" мейманканасын калыбына келтирүү, өлкө аймактарында глемпинг түйүндөрүн өнүктүрүү, Бишкек шаарына жакын жерде кароо аянтчасын түзүү боюнча долбоорду ишке ашыруу пландары тууралуу маалымат берилди", - деп айтылат билдирүүдө.

Кеңешменин жыйынтыгында Министрлер кабинетинин башчысы тиешелүү мамлекеттик органдарга жана жергиликтүү бийлик органдарына өлкөнүн туристтик потенциалын өнүктүрүүгө багытталган жогоруда аталган долбоорлорду мындан ары иштеп чыгууну тапшырды.