Орусиянын жарандыгын алган кыргызстандыктар Орусиядан чыгарылбай жатканы айтылды

Орусиянын жарандыгын алган КМШ өлкөлөрүнөн келгендерге Орусиядан чыгууга тыюу салынууда. Бул тууралуу “Азаттык” радиосу мекенине кетүүгө аракет кылып, бирок чек арадан өтө албай калган кыргызстандык жана тажикстандык бир нече жарандарга шилтеме берүү менен билдирди.

"Орус чек арачылары мага "сен мобилизациялык тизмеге кирдиң, бул мыйзам, 12-февралга чейин чет өлкөгө чыгууга укугуң жок" деп сылык түшүндүрүштү", - деген Орусиянын жарандыгын алгандардын бири.

Башка булактардын айтымында, Орусиянын жарандыгын алган мигранттар чакыруу кагаздарын алышат.

Ошондой эле алар военкоматтарга сүйлөшүүгө чакырылып, куралдуу күчтөрдөн качкандар катуу жазаланарын түшүндүрүшөт. Мигранттардын жакындарынын айтымында, орус паспортунун ээлери аэропорттордо токтотулат, ал эми Орусиянын жарандыгы жок Борбор Азиядан келгендер мекенине ээн-эркин кете алышат.