Бишкекте айрым мектептерде экинчи нөөмөттө окуган окуучулар эки күн онлайн окушат

Бишкектеги мектептерде экинчи нөөмөттө билим алган окуучулар эки күнгө онлайн окутууга өттү. Бул тууралуу калаа мэриясынын маалымат кызматынан билдиришти.

Маалымдалгандай, онлайн окутуу бүгүн, 26-январда жана 27-январь күндөрү болот. Анткени бул күндөрү саат 14:00дөн баштап айрым жолдор жарым-жартылай тосулат.

"Мындан улам окуучулардын коопсуздугун камсыз кылуу жана балдардын караңгыда калып калышына жол бербөө максатында экинчи нөөмөттөгү сабактар онлайн окутуу форматында өткөрүлдү", - деп айтылат маалыматта.

Окуучулар кийинки жуманын башынан тарта кадимки окуу режимине кайтып келишет.

Белгилей кетсек, 26-27-январда Өзбекстандын президенти Шавкат Мирзийоев баштаган делегация мамлекеттик сапар менен Бишкекте болот. Буга байланыштуу жолдорго убактылуу чектөө киргизилет.