Салык декларациясын кабыл алуу өнөктүгү башталды
Мамлекеттик салык кызматы 2022-жылдын жыйынтыгы боюнча бирдиктүү салык декларациясын кабыл алуу өнөктүгү башталганын кабарлады.
Декларация тапшыруу эки этап менен өтөт. Ага ылайык, 1-апрелге чейин юридикалык жактар, мамлекеттик жана муниципалдык кызматкерлер, ал эми 1-майга чейин жеке жактар жана ишкерлер өткөн жылдагы кирешеси, мүлкү тууралуу отчёт бериши керек.
Мекеме мындан тышкары 1-майга чейин салык декларациясын жыл ичинде 300 миң сомдон ашык суммадагы мүлк сатып алган жактар да тапшырышы керектигин эскертти. Алар менен катар эле мамлекеттик үлүшү бар уюмдардын, ишканалардын кызматкерлери, убактылуу жашап туруу укугу же кайрылман статусу бар, эл аралык уюмдагы ишинен киреше алган жарандар да тапшыра тургандыгы маалымдалды.
Белгилей кетсек, Кыргызстандын мыйзамдарында мамлекеттик, саясий кызматтарды ээлегендер жыл сайын киреше-чыгашасы, мал-мүлкү боюнча декларация тапшырат.
Буга чейинки декларациялык кампаниялардын жыйынтыгында, өлкөдөгү эң бай делген аткаминерлердин айрымдары мүлкүн жашырып, кагаз жүзүндө эч нерсеси жок болуп чыкканы коомчулуктун сынына кабылган.
