Бишкекте таштандыны иргей турган дагы бир жай иштеп баштады

Бишкек шаарында катуу таштандыларды иргөөчү дагы бир пункт иштей баштады. Бул тууралуу шаардык мэриядан кабарлашты.

Маалыматка ылайык, аталган жай Октябрь районунун аймагындагы Анкара көчөсүндө жайгашкан.

"Анда 12 евроконтейнерлер, 2 видеокөзөмөл камерасы орнотулган.Таштандыны иргөө үчүн иш бөлмө курулуп, суу, канализация жана электр энергиясы менен камсыздалды.

Контейнерлерди жаан-чачындан коргоо үчүн атайын бөлүнгөн жердин үстү тосулган. Аларды орнотууда жакынкы үйлөрдүн калкы да эске алынган", - деп жазылат маалыматта.

Долбоордун максаты:

1. Жарандардын маданиятын калыптандыруу жана экологиялык аң-сезимди өнүктүрүү;

2. Экологиялык абалды жакшыртуу жана ден соолукту сактоо;

3. Менчик компанияларды тартуу жана шаардын киреше бөлүгүн көбөйтүү.

Белгилей кетсек, аталган пилоттук долбоор инвесторлордун эсебинен ишке ашырылууда. Буга чейин Биринчи Май районунун аймагында таштандыларды иргөөчү эки пункт иштей баштаган.