Түркиядагы жер титирөө: Кыргызстандын 8 жараны эвакуацияланды

Түркиянын Адана, Кахраманмараш жана Османие шаарларынан Кыргызстандын 8 жараны коопсуз жайга көчүрүлдү. Бул тууралуу Тышкы иштер министрлиги кабарлады.

"Кыргызстандын сегиз жараны Адана, Кахраманмараш жана Османие шаарларынан коопсуз жайларга көчүрүлдү. Малатияда Кыргыз Республикасынын тогуз жаранына, анын ичинде эки балага жана бир кош бойлуу аялга жардам көрсөтүлүүдө. Убактылуу жашаган жеринде жүргөн Кыргыз Республикасынын жарандарына жылуу кийимдер, жууркан-төшөктөр, суу жана тамак-аш берилди. Кырсык болгон аймакта иштөө коммуникация, интернет жана электр энергиясындагы техникалык көйгөйлөрдөн улам татаалданууда", - деп билдиришти министрликтен.

Ошондой эле Тышкы иштер министрлиги каза болгондордун жана жабыркагандардын өздүгүн тактоо иштери уланып жатканын, бүгүн, 8-февраль саат 12:00гө карата каза болгондордун арасында Кыргыз жарандары жок экенин кошумчалады.