Түркиядагы жер титирөө: Муфтият жабыркагандар үчүн мечиттерде жардам чогултууда

Кыргызстан мусулмандарынын дин башкармалыгы Түркияда катталган зилзаланын кесепеттерин жоюуга байланыштуу жардам чогултуп жатат. Бул тууралуу бүгүн, 8-февралда муфтияттын басма сөз кызматынан кабарлады.

Маалыматка ылайык, жардамдар өлкөдөгү ар бир мечитте топтолууда. Тапшырыла турган кийим-кече, жууркан-төшөнчү жана буюм-тайымдар мүмкүн болушунча жаңы жана кышкы шарттарга ылайык болушу зарыл.

Ал эми акчалай жардам көрсөтүүнү каалагандарга атайын бирдиктүү эсеп ачылган. Төмөнкү реквизиттерге акча которууга болот:

Банк: “Айыл Банк” ААК

ИНН 01803199710084

БИК 135001

ОКПО 30597768

Эсеп № 1350102119900169 “КР финансы министрлигинин трназиттик эсеби (Түркия Республикасына жардам)” (сом, АКШ доллары, евро);

Төлөм коду 14411100 – “Учурдагы жардам”;

Максаты: Түркия Республикасына жарандардан жана юридикалык тараптардан жардам.

Муфтият учурда зилзаладан каза болгон түркиялык бир туугандарга багышталып Куран окулуп жатканын кошумчалады.

Соңку маалыматтарга караганда, Түркияда зилзаладан 5 894 адам көз жумса, 34 810 жаран жабыркаган. Мындан тышкары 5 775 турак жай ураган. Ал эми Сирияда каза болгондордун саны 1 712ге жеткени жана 2 054 киши жабыркаганы айтылууда.