Жо Байден: "Орусия Украинаны эч качан жеңе албайт"

АКШ президенти Жо Байден шейшемби күнү Варшавада сөз сүйлөп жатып Орусия Украинаны эч качан жеңе албай турганын айтты. Бул тууралуу чет элдик басылмалар жазышты.

Ак үйдүн башчысы өз сөзүндө орусиялыктарга кайрылып, АКШ жана Европа өлкөлөрү Орусияны жок кылууну же көзөмөлгө алууну каалабай турганын билдирди.

"Батыш Путин айткандай, Орусияга кол салгысы келбейт. Бул согуш эч качан зарыл болгон эмес, бул трагедия. Путин бул согушту тандады. Согуштун ар бир жаңы күнү - анын тандоосу.

Согушка катышкан ар бир жаран жоопко тартылышы керек. Ошол эле кезде Орусия Украинаны эч качан жеңбейт. Эч качан", - деген Байден.

Байден эгер Орусия НАТО өлкөлөрүнүн бирине кол салса, бул бүткүл альянска кол салуу катары караларын эскертти.

"НАТОнун бир өлкөсүнө кол салуу бүткүл НАТОго кол салуу болот. Муну Путин билиши керек. Бул ыйык нерсе", - деген америкалык лидер.