Баткен окуясында курман болгон жоокерлер эскерилди

Бүгүн, 23-февралда Бишкектеги Т.Сатылганов атындагы Кыргыз улуттук филармониясында Мекенди коргоочулар күнүнө арналган “Карегимде мекен чеги” аттуу салтанаттуу иш-чара болуп өттү. Бул тууралуу Улуттук коопсуздук мамлекеттик комитети билдирет.

Маалымдалгандай, иш-чарага УКМК төрагасы Камчыбек Ташиев, Тажикстандын агрессиясынан улам курман болгон жоокерлердин үй-бүлө мүчөлөрү, Чек ара кызматынын өздүк курамы, күч түзүмдөрүнүн өздүк курамы катышты.

Иш-чаранын жүрүшүндө Камчыбек Ташиев жалпы мекен коргоочуларын майрамы менен куттуктап, өлкө тынчтыгы жана коопсуздугу үчүн ак дилден кызмат өтөөнү уланта берүүсүн каалады. Ошондой эле Баткен окуясында курман болгон жоокерлердин эрдигине таазим кылып, алардын жакындарына ыраазычылыгын билдирди. Төрага баатырлардын эрдиги эч качан унутта калбасын кошумчалады.

Аталган иш-чара 2022-жылы Баткенде тажиктердин куралынан каза тапкан жоокерлерди эскерүү максатында уюштурулган.

Эскерте кетсек, былтыр сентябрда кыргыз-тажик чек арасындагы куралдуу кагылышта 63 Кыргыз жараны каза болгон.