Жапаров билим берүү министринин милдетин аткаруучу Каныбек Иманалиевди кабыл алды

Бүгүн, 25-февралда президент Садыр Жапаров билим берүү жана илим министринин милдетин аткаруучу Каныбек Иманалиевди кабыл алды. Бул тууралуу өлкө башчынын маалымат кызматынан кабарлашты.

Анда мамлекет башчысы тарабынан илим жана билим чөйрөсүн өркүндөтүү боюнча бир катар конкреттүү милдеттер коюлуп, бул маселе боюнча артыкчылыктуу пландар жана милдеттер талкууланды.

Садыр Жапаров 2022-жылдын башында Билим берүү министрлигинин бюджети 29 миллиард сомдон 49 миллиард сомго чейин көтөрүлгөнүн дагы бир жолу эске салды. Ошондой эле каражат бөлүү менен эле көйгөй чечилбей тургандыгын, ал үчүн комплекстүү иш-аракеттерди жасоо зарылдыгын баса белгиледи.

Мындан башка мамлекет башчысы маалыматтык технологиялардын доорунда заманбап тенденцияларды ээрчүүнүн маанилүүлүгүн белгилеп, билим берүү системасы реформага муктаж экенин кошумчалады.

Ал эми министрдин милдетин аткаруучу Каныбек Иманалиев өлкө башчыга билим берүү тармагын өнүктүрүүнүн жакынкы пландары жана келечеги тууралуу маалымат берди. Ал билим берүү процесстеринин сапатын жогорулатууга багытталган Концепцияны жакынкы күндөрү сунуштай турганын билдирди.