Депутат Жаныбек Абировдун катышуусундагы мушташ: Кылмыш иши токтотула элек

Жогорку Кеңештин депутаты Жаныбек Абиров катышкан мушташ боюнча козголгон кылмыш иши токтотула элек. Бул тууралуу депутат Дастан Бекешев телеграм каналында билдирди.

Анын айтымында, жабырлануучу тарап тосмо арыз жазганына карабастан соттук териштирүү уланууда.

"Менин билишимче жабырлануучу тарап арызын кайра алган жана кылмыш иши кыскартылышы керек болчу. Бирок иш кыскартылган жок", - деген Бекешев.

Бүгүн, 27-мартта Жаныбек Абиров депутаттык мандатын тапшыра турганын билдирген.

Эскерте кетсек, 12-мартта Бишкектеги ресторандардын биринде мушташ тартылган видео социалдык тармактарга тараган. Анда мушташка катышкандардын бири депутат Жаныбек Абиров экендиги жана ал мекеменин күзөт кызматкерин сабап салганы айтылган болчу.

Жабырлануучу баш сөөгү жабыркап Улуттук госпиталга түшкөн. Окуяга президент Садыр Жапаров реакция жасап, Абиров соцтармак аркылуу элден кечирим сураган.

Октябрь РИИБи Жогорку Кеңештин депутаты Жаныбек Абировдун үстүнөн арыз түшкөнүн маалымдаган. 13-мартта Бишкек ШИИББи калаадагы ресторандардын биринин жанынан массалык мушташка катышканга шектүү катары эки жаран кармалганын билдирген. Алар 15-мартта СИЗО-1ге бир айга камакка алынганы маалым болгон.

Башкы прокурор Жогорку Кеңешке Абировду кылмыш жоопкерчилигине тартууга макулдук сурап кайрылган. Конституциялык мыйзам, мамлекеттик түзүлүш жана сот-укуктук маселелер боюнча комитет парламентке иштин жагдайын иликтеп чыга турган комиссия түзүүнү сунуштаган. Натыйжада териштирүүчү депутаттардын тобу түзүлгөн.