Жаныбек Абиров Жогорку Кеңештин трибунасынан дагы бир жолу кечирим сурады

Жогорку Кеңештин мурдагы депутаты Жаныбек Абиров трибунада сүйлөп жатып, коомчулуктан жана жабырлануучудан дагы бир жолу кечирим сурады.

"Жалпыңыздардын алдыңыздарда Аргенден жана анын үй-бүлөсүнөн, жакындарынан, ошондой эле мага ишеним көрсөткөн шайлоочуларымдан жана үй-бүлөмдөн чын жүрөктөн кечирим сурайм.

Сиздер менен биротоло коштошпоймун, жолугушканга чейин гана демекчимин", - деди Абиров.

Эске сала кетсек, 12-мартта Жаныбек Абиров мушташка катышканы белгилүү болгон. Мушташтан жабыркаган жаран Улуттук госпиталга жаткырылган.

Бул кадамы үчүн Абиров социалдык тармактагы баракчасы аркылуу элден кечирим сураган.

Ал эми 15-мартта Жогорку Кеңеш Жаныбек Абировго карата кылмыш ишин козгоого макулдук алуу үчүн Башкы прокурор киргизген сунушту карап, атайын депутаттык комиссия түзүлгөн.

27-мартта Жаныбек Абиров жоопкерчиликти сезип жатканын айтып, депутаттык мандатын тапшыра тургандыгын билдирген. Анын арызы БШКда каралып, Абиров мандатынан ажыратылган.