Актёр Эркин Эгембердиев 38 жашка толду. "Туулган күнүмдү майрамдабай калганыма көп жыл болду" дейт ал

Бүгүн, 14-апрелде "Дем" театрынын актёру Эркин Эгембердиев 38 жашка толду. Актёр мырзаны өздүк майрамы менен куттуктап байланышканыбызда, ал жакында коюла турчу спектаклге даярданып жатканын билдирди.

"Туулган күнүмдү өткөрбөй калганыма көп жыл болду. Бул күн мен үчүн кадимки күндөрдүн бири. Бүгүн шеринебиз бар. Биздин үй-бүлөбүз өткөрөт, ошол жакка барабыз.

Учурда жакында сахнага коюла турган "Шайтандын соту" аттуу спектаклге даярданып жатабыз", - дейт ал.

Эркин Эгембердиев 1985-жылы 14-апрелде Балыкчы шаарындагы Таш-Сарай айылында туулган. Мектепти бүткөндөн кийин Бүбүсара Бейшеналиева атындагы Кыргыз мамлекеттик маданият жана искусство университетине тапшырып, ийгиликтүү аяктаган.

2012-жылы сүйүктүүсү ырчы Диана Чотиевага үйлөнгөн. Ортолорунда Айбийке жана Ыйман аттуу кыздары бар.

"Келинчегимдин кесиби башка, бирок жакшы үнү бар. Анарбек Ибраев өңдүү мыкты музыканттардан сабак алып, үнүн таптаган. Жаңы үйлөнгөн кезде "үй-бүлөбүздү жакшылап түптөп алышыбыз керек" деп ырдатпай койгом. Эми баары өз нугуна түшүп калгандан кийин кайрадан ырдап баштады. Жубайымдын диплому бар, анча-мынча ырчыларга караганда жакшы ырдайт", - дейт жубайы тууралуу.