Ноокенде 59 жаштагы эркек киши дубинка менен зордукталганы айтылды

Ноокен районундагы милиция бөлүмүндө 19 жаштагы кыздын өлүмүнө шектүү жаран резина дубинка менен зордукталганын айтты. Бул тууралуу Кыйноолордун алдын алуу борборунун башчысы Бакыт Рысбеков Жогорку Кеңештин комитет жыйынында айтты.

"2022-жылдын 11-ноябрында Ноокен райондук ички иштер бөлүмүнүн башчысынын орун басары, нөөмөтчү Жогорку Кеңештин депутатын жана мени убактылуу кармоочу жайга киргизбей койгон. Одоно түрдө мыйзам бузулган. Ал жерде 1964-жылы туулган О.А. аттуу жаран кыйноого кабылгандыгын билдирген. Ал жаран 19 жаштагы кыздын өлүмүнө шектүү катары кармалган.

Эми, кечиресиздер мен айтууга милдеттүүмүн. Бул жаран резина дубинка менен зордукталганын айтып жатат. Биз прокуратурага кайрылдык, Ноокен прокуратурасы өзү жыгылып кетти деп жооп берди", - деди ал.

Ал ошондой эле тиешелүү кызматкерлер жазаланбаса акыбал оорлоп, кыйноо көбөйө берерин кошумчалады.