Тышкы иштер министри АКШ мамкатчысынын жардамчысын кабыл алды 

Бүгүн, 24-апрелде Тышкы иштер министри Жээнбек Кулубаев АКШнын Борбордук жана Түштүк Азия иштери боюнча жардамчысы Дональд Луини регионго жасаган сапарынын алкагында кабыл алды.

Бул тууралуу Тышкы иштер министрлигинен кабарлашты.

Жолугушуунун жүрүшүндө тараптар эки тараптуу мамилелерди өнүктүрүүнүн негизги маселелерин жана келечегин, анын ичинде коопсуздук, жашыл экономика, ошондой эле С5+1 механизминин алкагында кызматташуу маселелерин талкуулашты.

Кулубаев кыргыз тарап ар дайым өз ара кызыкчылыктарды эске алуу жана мамлекеттер ортосундагы кызматташууну жактай турганын белгиледи.

Америкалык тарап өлкөдөгү демократиялык институттарды жана жарандык коомду чыңдоого көмөк көрсөтүүгө ниетин ырастаган. Сүйлөшүүнүн соңунда тараптар кызматташуу боюнча диалогду улантууга ниеттерин ырасташты.

Дональд Лу Американын Кыргызстандагы элчиси катары 2018-жылдын сентябрь айынан тарта 2021-жылдын апрель айына чейин иштеген.