Жапаров Мамлекеттик ипотекалык компания аркылуу курулуп жаткан батирлердин курулушу менен таанышты

Министрлер кабинетинин төрагасы Акылбек Жапаров Мамлекеттик ипотекалык компания (МИК) аркылуу курулуп жаткан көп кабаттуу батирлердин курулушу менен таанышты. Бул тууралуу өкмөттүн басма сөз кызматынан билдирди.

Маалыматка ылайык, анда өкмөт башчы мурдагы № 47 түзөтүү колониясынын аймагындагы турак жай кичи районунун курулушу менен таанышты.

Таанышуу учурунда Акылбек Жапаров кыргызстандыктарды турак жай менен камсыз кылуу Министрлер кабинетинин артыкчылыктуу багыттарынын бири экенин белгиледи.

“Президент айткандай, мектеп курулбаган жерге түрмө салууга туура келет. Өлкөбүз өнүгүү жолуна ишенимдүү кадам таштады, мектептер, жолдор, бүтүндөй кичи райондор курулуп жатат. “Менин үйүм 2021-2026” программасынын алкагында 50 миңден ашуун үй-бүлөнү турак жай менен камсыз кылуу пландалууда. Президент бул милдетти алдыбызга койду”, – деди өкмөт башчы.

Ошондой эле ал жаңы турак жайларды курууда табигый мүнөздөгү тобокелдиктерди эске алуу менен курулуш нормаларын сактоо керектигин кошумчалады.