Акылбек Жапаров Казакстандын премьер-министри менен жолугушту

Министрлер кабинетинин төрагасы Акылбек Жапаров бүгүн, 19-майда Казакстандын премьер-министри Алихан Смаилов менен жолукту.

Өкмөттүн басма сөз кызматынан билдиргендей, Акылбек Жапаров Алматы шаарына “Европа Биримдиги – Борбордук Азия” экинчи экономикалык форумуна катышуу үчүн барган.

Жолугушууда тараптар эки өлкө ортосундагы ар тараптуу кызматташтык, ошондой эле эл аралык уюмдар менен интеграциялык бирикмелердин алкагындагы мамилелер күндѳн-күнгѳ тереңдеп жана өнүгүп келе жаткандыгын белгилешти.

"Ушул жылы Кыргызстандын жана Казакстандын аймактарында жогорку деңгээлдеги эки тараптуу интенсивдүү иш-чараларды өткөрүү күтүлүүдө. Тагыраагы, кыргыз-казак өкмөттөр аралык кеңешинин кезектеги 11-жыйыны, кыргыз-казак аймактар аралык форумунун биринчи отуруму сыяктуу бир катар иш-чараларды өткөрүү пландаштырылган", - деп айтылат билдирүүдө.

Жолугушуунун соңунда тараптар эки өлкө ортосундагы союздаштык мамилелерди жана стратегиялык өнөктөштүктү мындан ары дагы чыңдоого жана кеңейтүүгө өз ара ниеттерин билдиришти.