Аскар Акаев үч жерде лекция окууну пландаган. Министр бардыгын жокко чыгарды

Экс-президент Аскар Акаевдин пландаган лекцияларынын бардыгы жокко чыгарылды. Бул тууралуу Жогорку Кеңештин Социалдык саясат боюнча комитетинин жыйынында Билим берүү министри Каныбек Иманалиев айтты.

"Азыр мага айтышты үч жерде так эмес белгиленген экен. Үчөө тең болбойт. Илимдер академиясында дагы, Техникалык университетте дагы, Улуттук университетте дагы. Үчөө тең биз менен макулдашылган эмес. 26сы жана 29уна белгиленген экен, үчөө тең болбойт. Чечим чыгарттык", - деди Иманалиев.

19-майда экс-президент Аскар Акаев жубайы Майрам Акаева экөө Казакстан аркылуу Кыргызстанга киргени маалымдалган. Кийинчерээк анын тарапташтары Акаев Кыргызстандагы университеттерде лекция окуй тургандыгын билдиришкен.

Бул маалымат коомчулукта кызуу талкууга алынып, депутаттар Исхак Раззаков атындагы Кыргыз мамлекеттик техникалык университетинин ректору Мирлан Чыныбаевге чара көүү керектигин айтты.