Самарада баңгизат таратууга шектелип дагы бир кыргызстандык кармалды

Самара шаарында Кыргызстан жана Өзбекстандын жарандары баңгизатын таратып жаткан жеринен кармалды. Бул тууралуу Орусиянын ички иштер министрлигинин Самара облусу боюнча башкы башкармалыгы билдирди.

"Ыкчам кызматкерлер Самара шаарынында эки тургун, тагыраагы Өзбекстан жана Кыргызстандын жарандары баңги затын мыйзамсыз жүгүртүү менен алектениши мүмкүн деген ыкчам маалымат алышкан. Ыкчам иш-чаралардын жүрүшүндө маалымат тастыкталды", - деп жазылат билирүүдө.

Аталган шаардын Киров районундагы май куюучу жайдын жанынан кармалган. Тинтүү учурунда алардын биринен ак түстөгү зат салынган баштыкча табылган.

Экспертизанын жыйынтыгында алынган зат жалпы салмагы дээрлик 310 граммды түзгөн героин экени аныкталган.

Кармалгандарга кылмыш иши козголду. Алар камакка алынып, учурда тергөө иштери уланууда.

Ушул жылдын 26-апрелинде Бишкекте жакындары Орусиянын абактарында отурган адамдар митингге чыгышты. Алардын көпчүлүгү жакындары баңгизатын тараткан деген шек менен кармалганын айтышкан.