Чолпон-Атада "Европа Биримдиги - Борбордук Азия" саммити өтөт

2-июнда Чолпон-Ата шаарында "Европа Биримдиги - Борбордук Азия" саммити өтөт. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.

Маалыматка ылайык, саммитке президент Садыр Жапаров, Казакстандын президенти Касым-Жомарт Токаев, Тажикстандын президенти Эмомали Рахмон, Өзбекстандын президенти Шавкат Мирзийоев, Түркмөнстандын министрлер кабинетинин төрагасынын орун басары Нурмухаммет Аманнепесов жана Европа кеңешинин президенти Шарль Мишель катышат.

Жолугушуунун алкагында эки региондун ортосундагы саясий, соода-экономикалык жана маданий-гуманитардык кызматташуунун учурдагы абалы жана келечек пландары талкууланат. Эл аралык күн тартибиндеги актуалдуу маселелер жана Борбордук Азия мамлекеттери менен Европа Биримдигинин өз ара аракеттешүүсү боюнча пикир алмашуулар болот.

"Президент Садыр Жапаров делегация башчылары менен эки тараптуу жолугушууларды өткөрөт. 3-июнда Европа кеңешинин президенти Шарль Мишелдин Кыргызстанга расмий сапары болот. Анда өлкө башчы Садыр Жапаров менен эки тараптуу сүйлөшүүлөр пландаштырылууда. Тар жана кеңейтилген форматтарда тараптар кыргыз-европалык өнөктөштүк маселелерин талкуулашат", - деп билдирди Азымбакиев.