Чүйдө көчөдөн аёосуз сабалган өспүрүмгө жардам бербей койгон дарыгер кызматтан алынды

Чүйдүн Васильевка айылында көчөдөн аёосуз сабалган 16 жашар өспүрүмгө жардам бербей койгон айылдык оорукананын башкы дарыгери кызматтан алынды. Бул тууралуу бүгүн, 11-июнда SUPER.KG порталына Саламаттык сактоо министрлигинен билдирди.

Маалыматка ылайык, аталган окуя боюнча Чүй облусунун Саламаттык сактоо координаторунун астында кызматтык иликтөө жүргүзүлгөн.

"Жыйынтыгында үй-бүлөлүк дарыгерлер тобунун клиникалык жетекчиси кетирген кемчиликтери үчүн ээлеген кызматынан бошотулду. Ал эми видеодогу бала тез жардам аркылуу Бишкек шаарынын балдар клиникалык тез жардам ооруканасына жеткирилип, тийиштүү жардам көрсөтүлгөн. Бүгүнкү күндө балага керектүү диагностика жасалып, дарылануудан өтүүдө. Абалы дарыгерлер тарабынан туруктуу деп бааланууда", - деп айтылат маалыматта.

Белгилей кетсек, аталган окуянын видеосу 9-июнда социалдык тармактарда тараган. Анда таяк жеп жерде жаткан өспүрүмдү алыстан карап, унаага отуруп кетип калган дарыгер коомчулуктун нааразычылыгын жараткан.

Ал эми Чүй облустук милициясы кечээ өспүрүмдүн аёосуз сабалганы боюнча кылмыш иши козголгонун маалымдаган.