Төө-Ашуудагы тоннелди суу каптады. Транспорт министри жерине барды

Транспорт жана коммуникациялар министри Тилек Текебаев Төө-Ашуудагы тоннелди оңдоп-түзөө иштери менен таанышты. Бул тууралуу министр социалдык тармактагы баракчасына жазып чыкты.

Айтымында, 12-июнда аталган тоннелди каптаган суу тазаланып, калыбына келтирилген.

"Элдин кайрылуусу менен Төө-Ашууга келип, тоннелди оңдоп-түзөөнү тездетүүнү тапшырдым. Тезинен бүткөрүү үчүн бардык аракеттер көрүлүүдө. Учурда жарыктандыруу иштери жүрүүдө, андан соң эле жаңы асфальт төшөлөт. Тоннелдин канализациясына таштанды толуп, суу акпай айдоочуларга ыңгайсыздык жаратып калган экен. Маселе тезинен чечилип, учурда калыбына келди" деп жазган ал.

Буга чейин социалдык тармакта тоннелдин ичин суу каптап, айдоочуларга ыңгайсыздык жаратып жатканы боюнча видео тараган.