"Мышык-чычкан ойноп...". Ленин районунун акими "Ош базарын" шаар четине жылдырууну сунуштады

"Ош базарын" шаардын четине жылдыруу керек. Бул тууралуу Ленин районунун акими Мураталы Тагаев Биринчи радионун эфиринде билдирди.

Анын айтымында, эл мыйзамсыз жана жарандарга да ыңгайсыз экенин билип туруп, тротуарга чыгып соода кылышат.

"Алар "Ош базарынын" ичинде эркин соода жайлары бар экенин билишет, бирок ал жерде отургусу келбей, көчөгө чыгып соода кылышат. Милиция менен биргеликте күн сайын текшерип турабыз. Барсак көчө тазалашат, кеткенден бир-эки сааттан кийин кайра чыгышат. Мындайча айтканда, "мышык-чычкан" ойноп жатабыз. Бул качанга чейин уланат?

Мен аким катары эмес, жаран катары айтам: Ош базарын шаардын сыртына жылдырып, буга шарт түзүп берүү керек", - деди Тагаев.

Ошондой эле Тагаев түшүнбөстүк болбош үчүн тараптар биргеликте иш алып баруусу керектигин кошумчалады.