Ысык-Көлдө адашып кеткен Орусиянын жаранына милиция кызматкерлери жардам беришти (сүрөт)

Ысык-Көлдө милиция кызматкерлери адашып кеткен орусиялык эс алуучуга жардам көрсөтүштү. Бул тууралуу Ысык-Көл облустук ички иштер башкармалыгынан билдиришти.

Маалымдалгандай, Орусиядан келген Александр Бостери айылындагы көл жээгинде жашы жете элек эки баласы менен бирге эс алууга барган. Алар 9-июлда Бишкек шаарында жашаган агасына бара жатышып, автобекетти таба албай адашып кетишкен. Ошол учурда унаа менен кайгуул иштерин жүргүзүп жүргөн милиция кызматкерлеринен жардам сураган.

Ага ылайык, Ысык-Көл ОИИБнын инспекторлору Таалайбек Мамбетакунов менен Нургазы уулу Азамат туристти балдары менен бирге автобекетке жол тарткан учурда, туристтин ден соолугу начарлаган. Милиция кызматкерлери ошол замат аны дарыгерге алып барышкан.

Турист дарыгердин текшерүүсүнөн өткөндө ден соолугунда эч кандай коркунуч жок экендиги аныкталып, милиция кызматкерлери аларды Бишкекке кетчү унаага салып жиберишкен.