"Ош менен Таласта да курулат". Акылбек Жапаров Бишкекте курулуп жаткан Перинаталдык борборго барды

Министрлер кабинетинин төрагасы Акылбек Жапаров кечээ, 11-июлда Бишкек шаарындагы медициналык мекемелерге барды. Бул тууралуу өкмөттүн басма сөз кызматынан билдирди.

Маалыматка ылайык, Акылбек Жапаров алгач ачылуу алдында турган Перинаталдык борбордун курулушунун жүрүшү менен таанышты.

"Дүйнөлүк стандартка ылайык курулган бул перинаталдык борбор жакын арада заманбап медициналык жабдуулар менен жабдылат. Медициналык мекемеде кош бойлуу мезгилде патологияга чалдыккан аялдарга жана патологиясы бар жаңы төрөлгөн ымыркайларга медициналык жардам көрсөтүлөт. Ооруканада 100дөн ашуун бейтапка орун каралган.

Бул Перинаталдык борбордун курулушу Германия өнүктүрүү банкынын (KFW) гранттык каражаттарынын эсебинен жүргүзүлүүдө. Борбор ушул жылдын аягына чейин ишке берилиши күтүлүүдө. Өкмөт башчы медициналык жардам көрсөтүүнүн сапатын жогорулатуу максатында мындай Перинаталдык борборлор Ош жана Талас облустарында дагы куруларын белгиледи", - деп айтылат маалыматта.

Акылбек Жапаров андан ары Бишкек шаарынын медициналык тез жардам балдар клиникалык ооруканасына барып, оорукананын жаңы хирургиялык кабыл алуу бөлүмүн реконструкциялоо иштери менен таанышып чыкканы кошумчаланды.