Кыргызстан менен Кытай биргелешкен өнүктүрүү фондун түзүү маселесин талкуулашты

Экономика жана коммерция министри Данияр Амангелдиев Кытайдын "Жибек жолу" фондунун президенти Цай Сюэцзюнь менен биргелешкен өнүктүрүү фондун түзүү маселесин талкуулады. Бул тууралуу кечээ, 21-июлда аталган министрликтен билдиришти.

Маалым болгондой, министр 2022-жылга карата соода-экономикалык кызматташуу боюнча өкмөттөр аралык комиссиянын жыйынынын алкагында тараптар эки тараптуу өнүктүрүү фондун түзүүнүн үстүндө иштөөнү макулдашканын белгиледи.

Ага ылайык, Данияр Амангелдиев бир катар келечектүү жана ири мамлекеттик долбоор демилгелерин белгилеп, аларды ишке ашырууга "Жибек Жолу" фонду сыяктуу ири инвестициялык фонддор катыша аларын кошумчалады.

"Цай Сюэцзюнь фонд Борбордук Азиянын, анын ичинде Кыргызстандын экономикасына инвестиция салууга кызыкдар экенин жана аларды каржылоонун эффективдүү механизмдерин, инструменттерин сыноо үчүн баштапкы этапта пилоттук долбоорлорду кароого даяр экенин белгиледи", - деп айтылат маалыматта.

Мындан тышкары тараптар Кыргыз-Кытай өнүктүрүү фондун ишке киргизүү боюнча стратегияны иштеп чыгуу үчүн Кыргызстандын каржы секторунун потенциалын биргелешип изилдөөнү макулдашты.