Ысык-Көлдөгү кырсык: Садыр Жапаров суу транспортун тартипке салуу тапшырмасын берди

Президент Садыр Жапаров Ысык-Көлдөгү эс алуучулардын коопсуздугун камсыздоо боюнча иш-чараларды күчөтүү тапшырмасын берди. Бул тууралуу өлкө башчынын басма сөз катчысы Эрбол Султанбаев билдирди.

"Садыр Жапаров Ички иштер министрлигине, Ысык-Көл облусундагы ыйгарым укуктуу өкүлүнө эс алуучулар менен туристтердин коопсуздугун камсыздоо боюнча профилактикалык иш-чараларды күчөтүүнү, анын ичинде суу транспортунун ишмердигин тартипке салууга өзгөчө көңүл бурууну тапшырды", - деп жазды Султанбаев фейсбук баракчасына.

Эске салсак, бүгүн, 25-июлда Чолпон-Ата шаарындагы пансионаттардын биринде скутердин айдоочусу көлдөгү 3 адамды сүзүп кетип, анын экөө каза болгону тууралуу маалымат чыккан. Көп өтпөй милиция маалымат таратып, моторлуу кайыктын айдоочусу көлдүн үстүндө жүргөн “Таблетка” балонун сүйрөтүп бара жатып, теплоходко урунганын билдирген. Кырсыктан 3 адам оор жаракат алып, экөө ооруканада каза тапса, бирөө оор абалда жандандыруу бөлүмүнө түшкөнү айтылган.