Кыргызстанда 1753 адам алимент төлөбөгөнү үчүн издөөдө жүрөт

Бүгүнкү күндө Кыргызстанда убагында алимент төлөбөгөн 1 753 жаран издөөдө жүрөт. Алардын баары эркектер. Бул тууралуу SUPER.KG порталына Сот департаментинен маалымдашты.

Сот департаментинин расмий маалыматына ылайык, өлкөдө алимент төлөбөй жүргөн 40 миң 194 адамга арыз түшкөн. Анын ичинен алимент үчүн издөөдө жүргөндөрдүн басымдуу бөлүгү (913) Жалал-Абад облусунун тургундары. Ал эми Ош облусу боюнча - 276, Баткен - 248, Чүй - 196, Талас - 51, Ысык-Көл - 47, Бишкек - 13, Нарын - 9 жаран издөөдө жүрөт.

Белгилей кетсек, буга чейин юрист Талгат Абдыжапаров суроолорубузга жооп берип жатып, алимент төлөбөгөндөргө Кылмыш-жаза кодексинин 178-беренеси менен 20 миңден 50 миң сомго чейин айып салынып, кырктан жүз саатка чейинки коомдук иштерге же эки айдан бир жылга чейинки мөөнөткө түзөтүү жумуштарына тартыларын айткан.