800 адам иш менен камсыздалат. Ошто кийим тигүүчү фабрика ишке кирет (сүрөт)

Жакында Ош облусунда ири индустриалдык-логистикалык парк ишке кирет. Бул тууралуу президенттин администрациясынын басма сөз кызматы билдирди.

Маалым болгондой, президент Садыр Жапаров Ош облусуна болгон иш сапарынын алкагында Кара-Суу районунда курулуп жаткан "ЕвроАзия ГРУПП" индустриалдык-логистикалык паркына барган.

Анда курулуп жаткан "ЕвроАзия ГРУПП" индустриалдык-логистикалык паркынын аянты мамлекет тарабынан бөлүнгөн 5 гектар аймакты ээлейт. Ал жерде үч өндүрүш аянты, башкача айтканда, трикотаж кийимдерин тигүү фабрикасы, трикотаж кездемесин токуп чыгаруу фабрикасы жана жип өндүрүү фабрикасы ишке кирет.

Учурда аталган курулуштун 70 пайызы аяктап калган. Андагы кийим тигүүчү фабрика ушул жылдын IV кварталында ишке кирет, ал 800 жумуш орундуу жана жылына 2,1 миллион даана өндүрүш чыгарат. Долбоор 2,6 миллион долларга бааланып, тигүү фабрикасынын продукциясы негизинен экспортко багытталат.

Трикотаж кездеме чыгарган фабриканын ишке кириши болсо 2024-жылдын IV кварталына пландаштырылган. 18 миллион долларга бааланган ишкана 300 адамды жумуш орду менен камсыздайт жана күнүнө 20 тоннага чейин кездеме чыгарат.

Ал эми жип ийрүүчү фабрикага 3,5 миллион доллар сарпталган. Анын өндүрүштүк кубаттуулугу күнүнө 15 тоннага чейин жетип, 2025-жылдын III кварталынан баштап иштей баштайт. Анда 150гө жакын адам эмгектенет.