Судья кызматтан кеткен окуя: Кылмышка шектүү кайра кармалды  

Ысык-Көл облусунун Ак-Суу районунда зордуктоого шектелген жарандын баш коргоо чарасы өзгөртүлүп, тергөө бүткөнгө чейин убактылуу кармоочу жайга камалды. Бул тууралуу бүгүн, 2-августта SUPER.KG порталына облустук соттун басма сөз кызматынан билдирди.

Маалыматка караганда, шектүүнүн аракеттери Кылмыш-жаза кодексинин зордуктоо, өмүргө же ден соолукка коркунуч келтирген зомбулукту колдонуу беренелерине которулган (154-берене 3-пункт).

"Б.Р.Б.га карата колдонулган үй камагы түрүндөгү бөгөт коюу чарасы камакка алуу түрүнө өзгөртүлүп, ал 27-сентябрга чейин камакка алынды", - деп айтылат маалыматта.

Белгилей кетсек, буга чейин айрым маалымат каражаттары Ак-Суу районунун тургунуна кошунасы кол көтөрүп, зордуктаганын жазган. Анда кылмышка шектүү райондук соттун чечими менен үй камагына чыкканы айтылган.

Андан көп өтпөй Жогорку соттун төрагасы Замирбек Базарбеков 1-августта коомчулуктун талкуусуна түшкөн бул окуяга байланыштуу ыкчам жыйын өткөргөн. Анын жыйынтыгында зордуктоого шек саналган адамды үй камагына чыгарган райондук соттун судьясы Абдисалам Мойдунов арыз жазып, кызматтан кеткени маалым болгон.