Дизелдин баасы төмөндөйт. Камчыбек Ташиев нефтетрейдерлер менен жолугушту

Нефтетрейдерлер дизель майынын баасын төмөндөтүүгө макул болду. Бул тууралуу УКМКнын маалымат кызматы билдирди.

Маалым болгондой, бүгүн, 5-августта УКМКнын төрагасы Камчыбек Ташиев, Мамлекеттик салык кызматынын төрагасы Алтынбек Абдуваповдун, Монополияга каршы жөнгө салуу кызматынын төрагасы Кеңешбек Тайлаковдун жана ошондой эле күйүүчү май рыногунда баа түзүү маселеси боюнча ата мекендик мунай рейдерлеринин өкүлдөрүнүн катышуусунда жыйын болду.

Жолугушуунун жүрүшүндө Камчыбек Ташиев бүгүнкү күндө нефтетрейдерлер дизель майын жогорулатылган баада сатып жатканын белгиледи

“Буга байланыштуу нефтетрейдерлерге социалдык багыттагы баа саясатын кармануу сунушталып, бааларды төмөндөтүү зарылдыгы эскертилди. Ошондой эле бааны төмөндөтүү жана мындан кийин дизелдин бир литрин 63-64 сомдон ашырбоо зарылдыгы белгиленди”, — деп айтылат билдирүүдө.

Өз кезегинде нефтетрейдерлер дизель майынын баасын төмөндөтүү боюнча тиешелүү чараларды көрүүнү макулдашты.