Билим берүү министри ШКУнун жайкы лагерине катышкан окуучулар менен жолукту 

Билим берүү жана илим министри Каныбек Иманалиев Шанхай кызматташтык уюмуна (ШКУ) мүчө мамлекеттеринин “жаш журналисттери” жайкы лагерине катышып келген окуучуларды кабыл алды. Бул тууралуу бүгүн, 7-августта аталган министрликтен билдиришти.

Министрликтен маалымдалгандай, жайкы лагерь 14-26-июль күндөрү Пекинде өткөн. Окуучулар министрге лагерден үйрөнгөн тажрыйбаларын, алган сезимдерин, келечек пландарын айтып беришти.

Министр окуучуларга билим алуунун маанилүүлүгүн айтып, маалыматтык технологияларды өздөштүрүү учурдун талабы экендигин белгиледи.

"Нарын районундагы Түгөл уулу Усупбек атындагы орто мектебинин 10-классынын окуучулары Эркайым Замирбек кызы жана Наиля Жанарбек кызы мугалими Казыбек Асылбековдун жетекчилигинде жайкы лагерге барып келишти", - деп айтылат маалыматта.

Белгилей кетсек, аталган лагерге ШКУга мүчө тогуз мамлекеттен 18 жаш өкүл катышкан.