Майыптыгы бар аялды "Үйдө эле отурбайсыңбы!" деген троллейбустун айдоочусу жазаланат

Бишкектеги №11 троллейбустун айдоочусу майыптыгы бар Гүлмира Казакуновага пандусту ачып берүүдөн баш тарткан. Бул тууралуу ал Фейсбуктагы баракчасына жазып чыкты.

"Айдоочу орой мамиле кылып, пандусту ачуудан баш тартты. Троллейбустан түшүп баратканымда пандусту ачты, бирок мени арабам менен кошо түртүп түшүрүп салды. "Пандусту ачуу оңой деп жатасыңбы, сени жүргүнчүлөр көтөрсүн, эмне үчүн үйдө отурбайсың" деген сөздөрдү айтты", - деп жазды Гүлмира Казакунова.

Буга байланыштуу "Бишкек троллейбус башкармалыгына" байланышканыбызда, айдоочу каттамдан алынып, эмгек жазасына тартылары белгилүү болду.

"Айдоочунун аракетине атайын комиссия баа берет. Ал сөзсүз түрдө эмгек жазасына тартылат. Ошондой эле Троллейбус башкармалыгынын жетекчилиги Гүлмира Казакуновадан кечирим сурап, ал комиссияга чакыртылды", - деп билдиришти башкармалыктан.