Улуу Ата Мекендик согуштун ардагери Суранбай Алиев 103 жашында каза болду

Алиев Суранбай 1920-жылдын 10-майында Ош облусунун Алай районуна караштуу Жошолу селолук советинде жарык дүйнөгө келген. Мектеп жашына жеткенде Жошолу айылындагы башталгыч мектепте билим алган.

Колхоздоштуруу мезгилинде өспүрүм кезинен баштап, жыйырма жашка чейин колхоз жумушуна иштеген.

1941-жылы Советтик Армиянын катарына чакырылып, Улуу Ата Мекендик согушка аттанган. Согуш мезгилинде Советтер Союзунун Саратов, Волгоград, Калининград, Ростов-на-Дону шаарларын коргоого жана бошотууга катышкан.

1944-жылдын декабрь айында немецтик фашисттер менен болгон катуу кармашта оң колунан оор жаракат алып, госпиталга жаткырылып, андан кийин мекенине кайтып келген. Кандуу согуштан кайтып келип, туулган айылындагы колхоздо кампачы, бир нече жылдар бою чабан, жылкычы болуп эмгектенип, Кара-Суу районундагы Отуз-Адыр совхозунда малды бордоп семиртүү комплексинде эмгектенген. Мал чарбасын өнүктүрүүгө зор салым кошуп, 1986-жылы ардактуу эс алууга чыккан.

Немецтик баскынчыларга каршы согушта көрсөткөн эрдиги үчүн бир нече орден, медалдар менен сыйланган. 9-Май улуу Жеңиш күнүнө карата өткөрүлгөн салтанатта эки ирет Кыргызстандын президентинин, 2019-жылы Орусиянын президенти Владимир Путиндин атайын сыйлыктары менен сыйланып, Москва шаарына сыйлуу конок катары чакырылган.

Өмүрлүк жары Мырзаева Мария менен 4 уул, 4 кыздын ата-энеси болуп, 80ге жакын небере-чеберенин бактылуу чоң атасы болгон.

Ардагердин ысымы Кара-Суу районундагы Шарк айыл өкмөтүнүн Медресе айылынын №5 көчөсүнө берилген.