Министрлик Соң-Көл жайлоосундагы мал шарп ылаңы менен ооруганын төгүндөдү

Айыл чарба министрлиги Соң-Көл жайлоосунда бодо мал шарп ылаңы менен ооруп жатканын төгүндөдү. Бул тууралуу бүгүн, 9-августта аталган министрликтин маалымат кызматы билдирди.

Ага ылайык, "Соң-Көл жайлоосунда бодо мал шарп ылаңы менен ооруп жатат" деген такталбаган маалымат интернет булактарына чыгып кеткен.

Буга байланыштуу министрликке караштуу ветеринардык кызмат малчылар менен жолугушуп, жеринде мониторинг жүргүзүшкөн.

"Нарын облусунун Соң-Көл жайлоосуна Кочкор, Ак-Талаа жана Жумгал райондорунун малчылары чыгышат. Буга байланыштуу жайкысын аталган үч райондун ветеринардык башкармалыктарынын инспекторлору жеке ветеринардык врачтар менен биргеликте аталган жайлоого барып, малчылар менен жолугушуп, жеринде мониторинг жүргүзүшөт. Ошондой эле эпизоотиялык кырдаалды анализдеп, текшерип турушат.

Акыркы жолу инспекторлор 18-19-июль күндөрү аталган жайлоого барып мониторинг жүргүзүп келишкен. Малчылардан эч кандай даттануулар жана арыздар түшкөн эмес, эпизоотиялык абал туруктуу, жугуштуу ылаңдардан таза деп белгиленген", - деп айтылат анда.

Мындан тышкары, Соң-Көл жайлоосуна бекитилген ветеринар адистер жума сайын мониторинг жүргүзүп, райондук ветеринардык башкармалыкка маалымат берип турушат. Бул боюнча жеринде түзүлгөн актылар бар экени маалымдалат.