Транспорт министрлиги өлкөдө аткарылып жаткан жол иштери боюнча маалымат берди

Өлкөдө жолдорго асфальт төшөө, аң-чуңкурларды толтуруу, жол белгилерин сырдап, жаңысына алмаштыруу иштери кызуу жүрүп жатат. Бул тууралуу бүгүн, 11-августта Транспорт жана коммуникациялар министрлигинен билдиришти.

Маалыматка ылайык, азыркы тапта Суусамыр-Талас-Тараз унаа жолундагы Өтмөк ашуусунун жолу асфальтталууда. Жеринде “Кыргыз авто жол” мамлекеттик ишканасынын №36 Жол тейлөө мекемесинин кызматкерлери иштеп жатышат. Жолдун 3,8-18,3-чакырым аралыгындагы тилкеси оңдолуп жатат. Жалпы 5 чакырым аралыкты жасоо пландалган. Бүгүнкү күндө 2 чакырым 300 метр жолго асфальт төшөлгөнү кабарланды.

- Нарын облусундагы Ача-Кайыңды-Калинин унаа жолуна асфальт төшөө иштери уланууда. Быйыл жалпы 14 чакырымды түзгөн унаа жолдун 3 чакырымын асфальттоо каралган. Учурда 550 метр жол жасалды;

- Ош-Баткен-Раззаков унаа жолунун (эски багыт) 195-207-чакырым аралыгын (Баткен-Боз-Адыр унаа жолу) асфальттоо жумуштары жүрүп жатат;

- Нарын облусундагы Баетов-Макмал унаа жолунун 4,5-10-чакырым аралыгында да асфальт төшөө иштери уланууда. Учурда бир чакырым 400 метр жол жасалды. План боюнча жалпы 6 чакырым оңдолот;

- Бишкек-Балыкчы-Нарын-Торугарт унаа жолунун 86-88-чакырым аралыгына битум менен шагыл аралашмасы төшөлүүдө.

Аталган жолдо көпүрөлөрдү актап, сырдоо иштери да жүрүп жатат;

- Барскоон-Ак-Шыйрак унаа жолунда суу жеп кеткен жерлер жана түтүкчөлөр оңдолуп, калыбына келтирилүүдө.