Бишкек мэриясы "Ала-Тоо" аянтындагы желектин тескерисинен илинип калышы боюнча үн катты

Бүгүн, 24-августта "Ала-Тоо" аянтындагы желектин тескерисинен илинип калышы боюнча Бишкек мэриясы "Тазалыкка" шилтеме берүү менен билдирүү таратты.

Билдирүүдө "Тазалыктын" жетекчиси Рамис Алиев кечээ, 23-августта чын эле желектин тескери илинип калганын айткан.

"Чын эле ошондой болду. Үч күн мурун желек жыртылып калган. Биз дароо жаңысын алып барганбыз. Желекти алмаштырууну ардактуу күзөт жүргүзөт. Анын өзүнүн процедурасы бар. 22-августта, кечкисин алар желекти тескери илип коюшуптур. Аны эртеси эртең менен байкашкан. Эртең менен ардактуу күзөткө жакын барганга болбогондуктан, желекти алмаштыра алышкан эмес. Түшкө жакын желекти кайра оңдоп илишкен", - деди Алиев.

Эске салсак, кечээ социалдык тармакта "Ала-Тоо" аянтындагы желектин тескери илинип калганы боюнча видео тараган болчу.