Аламүдүндө айыл чарба багытындагы жерлер турак-жай курууга мыйзамсыз берилип жатканы айтылды

Аламүдүн районунда айыл чарба багытындагы жерлер турак-жай курууга мыйзамсыз берилип жатат. Бул тууралуу Жогорку Кеңештин депутаты Сеидбек Атамбаев аталган райондун Мыкан айылынын тургундары менен жолугушуу учурунда белгилүү болду.

Парламенттин басма сөз кызматынан билдиргендей, жолугушуунун жүрүшүндө тургундар Мыкан айылынын калкына тиешелүү 312,5 гектар айыл чарба жерлери турак-жай куруу үчүн мыйзамсыз берилип жатканын айтышып, маселени көзөмөлгө алууну суранышты.

"Депутат Сеидбек Атамбаев айыл чарба, жайыт жерлерге турак-жай курууга мыйзам жол берилбегенин айтып, азык-түлүк коопсуздугун эске алуу менен Министрлер кабинетине жана тиешелүү мамлекеттик органдарга суроо-талаптарды жөнөтүп, маселени көзөмөлгө аларын билдирди", - деп айтылат маалыматта.