Бишкек шаардык прокуратурасы "Клооп" басылмасын жабуу боюнча сотко арыз берди

Бишкек прокуратурасы "Клооп" басылмасын жабуу боюнча сотко кайрылды. Бул тууралуу маалыматты бүгүн, 28-августта Бишкек шаардык сотунан ырастады.

Маалым болгондой, 22-августта Бишкек шаардык прокуратурасы Октябрь райондук сотуна "Клооп.Медиа" коомдук фонду Жарандык кодекстин 96-беренесинин 2-бөлүгүнүн 2-пунктуна ылайык уставда каралган чектен чыгып кеткен деген негизде арыз жазган. Учурда арыз соттун өндүрүшүндө экени айтылды.

Прокуратура жазган арызында басылманын сайтта жана социалдык тармактарда жарыялаган материалдары "азыркы бийликтин саясатын кескин сынга алууга, мамлекеттик жана муниципалдык органдардын өкүлдөрүн каралоого багытталган жана терс мүнөздө" деп эсептей турганын билдирген.

Ошондой эле арызда аталган медиага карата 2021-жылы 2-ноябрда УКМК тарабынан “бийликти басып алууга үндөгөн” деген айып менен сотко чейинки териштирүү иштери жүргүзүлгөнү жана экспертизалар дайындалганы да жазылган.

Эске салсак, "Клооп.Медиа" коомдук фонду 2018-жылы кайра каттоодон өткөн. Юстиция министрлигинин сайтында, аталган басылманын жетекчиси катары Галина Гапарова көрсөтүлгөн.