Өлкөдө ЖКККББ кызматкерлери мектептердин айланасындагы жол кыймылын жөнгө салууда 

ИИМдин жол кайгуул кызматкерлери өлкө аймагындагы мектептердин айланасында иш алып барышууда. Бул тууралуу бүгүн, 1-сентябрда Жол кыймылынын коопсуздугун камсыздоо башкы башкармалыгынан билдиришти.

Маалым болгондой, жаңы окуу жылынын башталышында ЖКККББнын кызматкерлери республика аймагындагы жалпы орто мектептерге бекитилип, мектептин айланасында жол кыймылын жөнгө салууда.

Ага ылайык, мектептерге жакын жайгашкан көчөлөрдө, жол чырактардын астыларында жана жөө өтмөктөрдө окуучулардын коопсуздугу үчүн тийиштүү иш-чараларды жүргүзүүдө. Ошондой эле мектептердин айланасында жол тыгындарын болтурбоо үчүн көчөлөрдүн кесилиштеринде жол тыгындарын жөнгө салып, туура эмес токтотулган авто унааларды алдырууда.

"Мектептердеги иш-чаралардын соңунда алгачкы класстардын окуучуларына жол кыймылынын коопсуздугун камсыздоо кызматкерлери жол эрежелерин эскертип, атайын анимациялык видео тасмаларды көрсөтүшүүдө.

Жол кыймылынын коопсуздугун камсыздоо кызматкерлери алгачкы класстын окуучуларынын ата-энелеринен окуучулар мектепке чейинки жолду, аралыкты толук жаттап билгенге чейин, өздөрү коштоп алып келип, алып кетип турууну өтүндү", - деп айтылат маалыматта.