Ырчы Айгерим Расул кызы "Дүйнө айымы" сулуулук сынагына катышат (видео)

Ырчы, актриса Айгерим Расул кызы "Дүйнө айымы" сулуулук сынагына катыша тургандыгын SUPER.KG порталына билдирди.

Анын айтымында, Орусиянын Сочи шаарында өтө турган дүйнөлүк сулуу айымдардын “Дүйнө айымы” сулуулук сынагына сапар алат.

“Дүйнө айымы” сулуулук сынагына сапар алганы турам. Бул сынакка 12 өлкөдөн 40 катышуучу чоң байгеге ат салышат. Ушул күнгө чейин элим, жерим үчүн ак эмгегимди жумшап аракеттенип келем. Азыр эми жаркын тилегиңер менен ак батаңыздарды жайып, мага бул кароо сынактан жеңишке жетүүгө өбөлгө болуңуздар. Сиздердин колдооңуздар мен үчүн абдан маанилүү. Кыргыз элимдин ар намысын бийик тутуп, болгон күч-аракетимди жумшайм. Дүйнөлүк “Lady world” сынагына Кыргызстан биринчи жолу катышканы турат. Ошол биринчилерден болуп бара жатканыма сыймыктанам жана жоопкерчиликти туюп турам. Буюрса, кыргыз кыздарынын аруулугун, акылмандуулугун жана эң башкысы сулуулугун дүйнө жүзүнө даңазалайм", - деп билдирди ырчы.

Мындан тышкары ал акыркы жылдары тынымсыз кароо-сынактарга катышып, ошол сынактардан ийгиликтерге жеткендиги тууралуу айтты.

"Мен акыркы эки-үч жылда көптөгөн сынактарга катышып келе жатам. Катышкан сынактардын баары эле ийгиликтүү болду. Бир жерде токтоп калбай, эл аралык деңгээлге чыгуунун аракетин көрүп жүрөм. Мен биринчи жолу эл аралык деңгээлдеги сынакка катышканы турам. Бул сынакка катышууну мага Гүлзинат Суранчиева сунуштады", - деп кошумчалады ырчы.

Ошондой эле Айгерим "Дүйнө айымы" сынагында айымдардын бир эле сулуулугу эмес анын ийгилиги, жеке жашоосундагы ийгилиги, коомдогу орду да карала тургандыгын айтты.

Белгилей кетсек, "Дүйнө айымы" сулуулук сынагы 17-сентябрдан 23-сентябрга чейин уланат.