Акыйкатчы институту сот отурумдарын аудио-видео фиксация менен камсыздоого чакырды

Акыйкатчы институту сот органдарын отурумдарды аудио-видео фиксация менен камсыздоого чакырды. Бул тууралуу аталган мекемеден билдиришти.

Маалым болгондой, институт сот органдарын аудио, видео жаздыруу системаларынын тынымсыз иштөөсүн камсыз кылууга жана бузулган учурларды ыкчам оңдоо зарылдыгына көңүл бурууга чакырды.

Сот жыйындарын мониторинг кылуу учурунда процессти аудио же болбосо видео фиксация (АВФ) менен камсыздоодо маселелер бар экени аныкталган.

"Акыйкатчы институтунун сот органдары менен иштөө жана соттук процесстерге мониторинг жүргүзүү иштери боюнча бөлүмүнүн башчысы Самат Калчабаев аудио жана видео фиксация системалары бузулгандыктан улам сот процесстери аргасыздан башка учурга жылып калып жатканын билдирди.

“Мындай жагдай процесстин катышуучуларын нааразы кылат. Анча оор эмес кылмыш, азыраак оор, оор жана өзгөчө оор кылмыштар боюнча соттук териштирүүнүн мөөнөттөрү так регламенттелген.

Мисалы, ушул жылдын 11-августунда Бишкек шаарынын Свердлов райондук сотунда боло турган процесс АВФ системасы иштебей калгандыктан өткөн жок.

Техникалык бузулуу өз маалында оңдолгон эмес. Бул сотко катышып жаткандарды нааразы кылды”,- деп айтты ал.

Ага ылайык, Калчабаев АВФ системасы өз маалында техникалык тейлөө көрсөтө албаганы кылмыш иштерин мыйзамда белгиленген мөөнөттө кароого тоскоол болоорун кошумчалады.

Сот кызматкерлери менен сүйлөшкөн учурда АВФ системасын оңдоого 10дон ашык күн же андан көп убакыт талап кылынары айтылат.